ASABET IPOO

ESABET IPOO
Ikolo sek asonya, ajai Ipoo yen ejaikitai aidarenen akinei. Educokito Ikuwei akokwanar akinei. Adiope pak abu Ipoo kwape araar ŋesi bon ka akinei amagoro, ogeu ailulu aiŋala ituŋa ebe alomakito Ikuwei akinei. Ibore yen obu oinak ituŋa kere edakunete apuwa ne ajaasi Ipoo ka Akinei anu ti aikamun Ikuwei. Edolo ituŋa ne eluluo Ipoo, ekwesiarito ainyinyir don adumun ejaasi Ipoo ka Akinei keere. Abu Ipoo olomak akwenar ituŋa noi. Ibore yen abu itunyunyurik ituŋa toni aŋinyoikin ajalakin Ipoo ekwenar kesi oipone lo edonar ainyinyir. Abu Ipoo iswamaik ituŋa kwaŋin irwan nuipu.
Adiope pak ne alomakinatar Ikuwei akinei, abu Ipoo ilulu aiworotoi toni iporotoi awororikin. Mam yen abu okeru kwape eŋalator ŋesi ituŋa irwan ipu. Kwaŋin apotu Ikuwei olomakisi akinei toni Akinei aisiarar osipani kec. Ibore yen obu oinak Ipoo esali amagoro toni kwaare emotoi Akinei. Idarata ituŋa toni kwaare mam ewanyunito Ipoo ka Akinei, apotu do ituŋa otupasi Ipoo amagoro adumun emotoi Akinei omanyanakin noi idonarite da ainyinyir taitai. Iŋisi Ipoo ituŋa ibore yen mam kesi akerunatar nape iluluei ŋesi tape Akinei isiararos. Ebala lo akokosiarit kakere ebe, “Mam yen ecamuni eŋalan luce arai da iworo jo ka iporotoi lu ikiyara otoma abeitok. Imouni do ooni akinei moi. Aboŋosi ore”

NU ISISIAUNA: “Esabet duc elemari amunokina aluce mamakon. Emamei yen emuno lu asabaka arai da inerata abeitok”